– Som ein del av Forsvaret sin langtidsplan er det gitt tydelege føringar om at Heimevernet sine soldatar skal trene i fem dagar, medan spesialistar, befal og offiserar skal gjennomføre sju dagar med trening, seier distriktsjef for HV-08, oberstløytnant Øystein Nilsen.
Den årlege treninga skal utvikle dei grunnleggjande militære ferdigheitene til soldatane, slik at dei kan operere effektivt som avdelingar og bidra til å styrkje Forsvaret si operative evne og reaksjonsevne.
– Med ei skjerpa og meir uforutsigbar global og regional tryggleikssituasjon er det viktigare enn nokon gong at Heimevernet sitt mannskap trenar jamleg og innan relevante rammer. HV-08 består av vanlege menneske frå lokalsamfunnet som, i tillegg til sitt sivile liv, tek på seg eit ekstra ansvar som soldatar. Den årlege treninga er eit synleg prov på vår evne og vilje til å bidra til tryggleik i nærområdet, seier Nilsen.
Øvinga blir gjennomført i to fasar, med aktivitet i Agder frå 9. til 17. april og i Rogaland frå 13. til 27. april. Treninga er koordinert med politiet, og soldatane vil vere lett gjenkjennelege i norsk uniform.
Det vil førekome militær trafikk på enkelte vegar. Bruk av lausammunisjon og lysrakettar kan medføre støy i periodar. Dette er koordinert med kommunane der øvinga går føre seg.
– Som ein landsdekkjande beredskapsorganisasjon bidreg Heimevernet til å verne befolkninga og sikre viktig infrastruktur. Saman med andre militære og sivile aktørar utgjer vi ein sentral del av Noreg si forsvarsberedskap. Totalt vil over 4000 soldatar og befal delta på øvinga, seier Nilsen.
Øvinga har fått namnet «Jøssing», inspirert av hendingar under den andre verdskrigen.
– Namnet stammar frå Altmark-affæren i Jøssingfjorden. Under krigen brukte Nasjonal Samling «jøssing» som skjellsord om nordmenn som sympatiserte med britane. Befolkninga tok likevel ordet til seg, og det utvikla seg raskt til eit symbol på motstand og samhald, forklarer Nilsen.
Etter treninga håpar distriktsjefen at soldatane tek med seg nyttig kompetanse tilbake til sitt sivile yrke.
– Under øvinga får soldatane friska opp kunnskap innan mellom anna kriseleiing, avgjerdstaking, sanitet, samarbeid, situasjonsforståing, eigenberedskap og disiplin. Dette er ferdigheiter som òg er relevante både heime og i arbeidslivet, seier Nilsen.
Heimevernet sine hovudoppgåver:
- Bidra til nasjonal krisehandtering
- Gjennomføre vakthald og sikring av viktige militære og sivile objekt
- Støtte det sivile samfunnet, inkludert bistand til politiet
Kontaktperson:
Tore Ellingsen
tellingsen@mil.no
Telefon: 488 81 975